Image default
இதழ்கள் வெளியீடுகள்

புதிய சொல் 08

வணக்கம்,

இந்த இதழுடன் புதிய சொல் தனது மூன்றாவது ஆண்டில் காலடி எடுத்துவைக்கின்றது என்பதை மிகுந்த மகிழ்ச்சியோடு தெரிவித்துக்கொள்கிறோம்.  காலாண்டு இதழான புதிய சொல் தொடங்கி இரண்டு ஆண்டுகளில் ஏழு இதழ்கள் வெளிவந்திருக்கின்றன.  இடையில் ஒரு இதழ் தவற விடப்பட்டிருப்பதுடன் இந்த இதழும் தாமதமாகவே உங்கள் கைகளுக்குக் கிடைக்கின்றது.  இந்தத் தாமதத்துக்குப் பல்வேறு காரணங்கள் இருந்தாலும் மிக முக்கிய காரணங்களில் ஒன்றாக ஈழத்துப் பதிப்புகளுக்கான வலையமைப்பை உருவாக்குவதில் எதிர்கொள்கின்ற சவாலையே குறிப்பிடவேண்டும். 

ஈழத்தில் அச்சுச்செலவு, புலம்பெயர் நாடுகளுக்கு அனுப்புகின்ற கூலி என்பன அதிகமாக இருக்கின்ற சூழலில் ஈழத்தில் நடைபெறுகின்ற பதிப்பு முயற்சிகளுக்கு புலம்பெயர் நாடுகளில் நடைபெறுகின்ற விற்பனையும் மிக முக்கியமானது.  ஆனால் நடைமுறையில் அந்த சந்தையை விரிவாக்குவதற்கான பொறிமுறைகளை உருவாக்குவது என்பது கடினமானதாகவே இருக்கின்றது.  புதிய சொல்லுக்கு மாத்திரம் அல்லாமல் ஈழத்தவர்களின் பதிப்பு முயற்சிகளுக்கான விநியோகம் என்பது தனிநபர்கள் மற்றும் சிறு குழுக்களின் முன்னெடுப்பினாலும் ஆர்வத்தாலுமே இன்று வரை நடைபெறுகின்றது.  இந்த நிலைமாறி எமக்கான வலையமைப்பும் விநியோக ஒழுங்குமுறைகளும் கண்டடையப்படுவதே ஈழத்துப் பதிப்பு முயற்சிகள் தம்மை நிலைநிறுத்திக்கொள்ள ஆதாரமாக அமையும்.  புதிய சொல் இதழ்கள் தமக்குக் கிடைப்பதில்லை என்று பல்வேறு நாடுகளில் இருந்தும் எமக்கும் மின்னஞ்சல் ஊடாகவும் சமூக வலைத்தளங்கள் ஊடாகவும் பல ஆர்வலர்கள் கேட்டிருக்கின்றார்கள்.  ஆனாலும் அவர்களுக்கான இதழ்களை அனுப்பி வைப்பதில் நடைமுறைச் சிக்கல்களை எதிர்கொள்ளவேண்டி இருக்கின்றது.  விநியோகம், சந்தை என்பவற்றில் இருக்கின்ற இந்த இடர்ப்பாடுகள் காரணமாக பதிப்பு முயற்சிகளுக்குத் தேவையான நிதியைத் திரட்டுவதிலும் சவாலைச் சந்திக்கவேண்டி இருக்கின்றது.  புதிய சொல்லின் ஆரம்ப இதழ் முதலாக அதற்கான நன்கொடைகளைத் தொடர்ந்து வழங்கிவருகின்ற அன்பர்களின் ஆதரவே எமக்கு மிகப்பெரிய பலமாகும்.  இவர்களைப் போன்ற அன்பர்களின் ஆதரவே ஈழத்துப் பதிப்புமுயற்சிகள் என்கிற கனவினை உயிர்ப்புடன் வைத்திருக்கின்ற உதவுகின்றன.

இதேசமயம், ஈழத்துப் பதிப்புகளை இந்தியாவிற்குக் கொண்டு செல்வதில் இருக்கின்ற சிக்கல்களை மிகவும் அயர்ச்சியை ஏற்படுத்துகின்றன.  தனிப்பட்ட சில நண்பர்கள் ஊடாகவே புதிய சொல் இதழ்கள் தமிழ்நாட்டிற்குக் கொண்டு செல்லப்பட்டிருக்கின்றனவே அன்றி தபால் மூலம் அனுப்புவது சாத்தியமில்லாததாகவே இருக்கின்றது.  தமிழகத்திலிருந்து அடிக்கடி ஈழத்துக்கு வந்துபோகும் படைப்பாளிகளோ அல்லது ஈழத்தவர்கள் பற்றி அடிக்கடி அக்கறைப்படுகின்ற தமிழகத்துப் படைப்பாளிகளோ இந்த நிலைபற்றிய விமர்சனங்களை முன்வைப்பதும் இல்லை, ஈழத்தில் இருந்து வெளிவருகின்ற பதிப்புகள் குறித்து பொதுவெளியில் அக்கறைப்படுவதுமில்லை.  இந்தப் பின்னணியில் ஈழத்தவர்களுக்கான பதிப்பகங்கள், அடையாளங்கள், வலையமைப்புகள், அவை பற்றிய உரையாடல்கள் என்பன தொடர்பாக மிகுந்த பிரக்ஞையுடன் நாம் முன்னெடுக்கவேண்டும் என்பது மென்மேலும் உறுதியாகின்றது.

புதிய சொல்லின் தொடக்க இதழ்களில் நாம் தொடர்ச்சியாக உரையாடல்களில் பங்கேற்குமாறு கோரிக்கைகளை முன்வைத்து வந்தோம்.  கடந்த சில இதழ்களில் ஆரோக்கியமான பல்வேறு கருத்துப்பகிர்வுகள் எமக்குக் கிடைத்திருக்கின்றன.  இந்த இதழிலும் இரண்டு வாசகர் கடிதங்கள் வெளிவருகின்றன.  அதுபோல எமக்குப் பல்வேறு ஆக்கங்களும் தொடர்ந்து கிடைக்கப்பெறுகின்றன.  குறிப்பாக அச்சு ஊடகங்களில் அதிகம் எழுதியிராத சிலர் புதிய சொல்லுக்கு அனுப்பிய ஆக்கங்கள் மிகுந்த நிறைவைத் தருவனவாக அமைந்திருக்கின்றன.  இவை உண்மையில் மகிழ்ச்சியளிக்கின்ற விடயங்கள் ஆகும்.  எமக்குக் கிடைக்கின்ற சில ஆக்கங்களை அவை இதழுக்கான உள்ளடக்கங்கள் நிறைவு செய்யப்பட்டபின்னர் கிடைத்ததாலோ அல்லது புதிய சொல்லுக்குப் பொருத்தமற்றது என்று கருதியதாலோ அவற்றைப் பிரசுரிக்க முடியாமல் போயிருக்கின்றது.  இயன்றவரை இவற்றுக்கான பதில்களை நாம் அனுப்பினாலும் சிலவேளைகளில் அவை தவறவிடப்பட்டிருக்கின்றன.  இதற்காக புதிய சொல் ஆசிரியர் குழுமம் பொறுப்பேற்று மன்னிப்புக் கோருக்கின்றது.

புதிய சொல்லின் தொடக்கம் முதலாகவே நாம் மொழியாக்கங்கள் குறித்த எமது கரிசனையைப் பற்றித் தெரிவித்திருந்தோம்.  வரலாறு, சமூகவியல், வாசிப்பு, சமகால கலை இலக்கியச் செல்நெறிகள் தொடர்பான கட்டுரைகள் போன்றவற்றை புதிய சொல்லில் மொழியாக்கம் செய்து வெளியிடவேண்டும் என்பதே புதிய சொல்லின் நோக்கம்.  ஆயினும் குறித்த துறைகளில் மொழியாக்கம் செய்பவர்களைக் கண்டுபிடிப்பது அரிதாகவே இருக்கின்றது.  புதிய சொல்லின் சென்ற இதழிலும் இந்த இதழிலும் வெளிவந்திருக்கின்ற கொள்ளை அரசியல், நிலமானியம் : ஆசியாவினது இலங்கையினதும் சமூக உருவாக்கம் பற்றிய ஆய்வு என்பன மிக முக்கியமான மொழியாக்கங்கள். இவற்றுடன் சமகால கலை இலக்கியச் செல்நெறிகள் பற்றிய மொழியாக்கங்களும் சேர்ந்து வெளிவரும்போது இதழ் இன்னமும் முழுமையடையும் என்று கருதுகின்றோம்.  குறித்த துறைகளில் மொழியாக்கம் செய்யும் அக்கறையுடன் இருப்பவர்கள் தமது மொழியாக்கங்களை எமக்கு அனுப்பி வைப்பது புதிய சொல்லின் வளர்ச்சிக்கு உதவியாக இருக்கும்.

புதிய சொல்லின் நோக்கங்களில் ஒன்றாக புத்தகங்களைப் பதிப்பிப்பதையும் முன்னர் குறிப்பிட்டிருந்தோம்.  இந்த ஆண்டு முதல் புதிய சொல் புத்தகங்களைப் பதிப்பிப்பதிலும் தனது கவனத்தைச் செலுத்த இருக்கின்றது. அவை தொடர்பான அறிவிப்புகள் மிக விரைவில் வெளிவரும்.  ஓர் இனத்தின் பண்பாட்டு அசைவுகளில் பதிப்பு முயற்சிகள், உரையாடல்கள் என்பன மிக முக்கியமான பாத்திரத்தை வகிக்கின்றன.  அந்த அசைவியக்கத்தில் நாமும் பங்கேற்போம்.

தோழமையுடன்

புதிய சொல்     

Related posts

ஒரு நிலவுருவில் மூன்று மொழியுடல்கள்

puthiyasol

புதிய சொல் 04

editor

புதிய சொல் 03

editor

Leave a Comment